أزاي تتعامل مع الناس الحقودشية ؟؟؟

أولا كدا الإنسان الحقود ده بيبقي عنده نقص و افتراضات أنه أقل من الناس اللي حواليه . المشكله أن الحاجة دي بتتحول لحاجه وحشة وهي أن الشخص ده بيكون نفسه يكون اللي عند غيره عنده ، أو أوحش وهي أنه يكون نفسه تبقي الحاجة دي لوحده هو بس ومتبقاش موجودة عند غيره اللي هي تمني زوال النعمة من عند الآخرين . والشخصية دي طبعا استحالة تعترف أن عندها الحاجات دي لأن مفيش حد بيحب يكون وحش قدام نفسه ودائما بيتظاهر قدام غيره أن بيحب له الخير ويغالي في ذلك الحب ولكن في الحقيقة رد فعل الشخص ده وتصرفاته بتكون عكس كده تماما يعني مثلا الشخص ده ممكن لما يتكلم معاك يقعد يبينلك قد ايه هو بيحبك وقد ايه هو بيتمنالك الخير وممكن يمدحك ولكن بعدها يحاول أنه يطلع كل الكلام الوحش اللي هيأثر فيك بالسلب بس طبعا مش هيقولك أن الكلام ده منه لأ الناس هما اللي بيقولوا عليك كدا ويقعد يحللك تصرفات الناس بطريقة تحسسك أن كل اللي حواليك بيكرهوك وبيغيروا منك كل ده في محاولة منه أن يبعد عن تفكيرك أن هو ذات نفسه اللي بيحقد عليك . وطبعاً التصرفات دي بتكون لا شعوري يعني هو مش قاصد أنه يبينلك أنه هو بيحبك وهو اللي صاحبك وباقي الناس وحشين الحاجة دي بتحصل معاه تلقائي لأن الشخص ده غالباً بتكون معاه اضطرابات شخصية وطبعا الشخص ده علي الرغم من كمية الحب اللي بيظهرهولك وأنت قاعد معاه علي قد ما بتكون قرفان منه ولما بتقوم من عنده بتكون مضايق ودي اسمها الطاقة السلبية اللي بيقدمهالك الشخص الحقود والسبب الصراع اللي جواك ما بين كلام الشخص ده والحقيقة اللي أنت شايفاها اللي هو يعني يا تري الشخص ده فعلاً بيحبني طب ولو فعلا بيحبني هو ليه مصر أنه يضايقني ويجرحني كل ما يقعد معايا ؟؟؟!!
طيب ازاي اتعامل مع الشخص ده ؟؟؟ نصيحة كدا ابعد عنه لأن أنت لو تعرف حد بيحقد عليك ويحسد فيك عمره ما هيعترف بكدا وعمرك ما هتعرف تغيره فابعد عنه احسنلك لأنك مش هينولك منه غير الزهق والقرف من كل حاجة حواليك و هتبقي مش طايق اي حاجة حواليك لا بيتك ولا شغلك ولا دراستك . وحاجة بسيطة علشان تعرف الشخص ده خد بالك من تعبيرات وشه وحركاته لما حد يقولك خبر حلو أنك نجحت مثلاً أو حتي يمدحك وخد بالك من تعبيرات وشه لما حد لقدر الله يقولك خبر وحش .
ومن الحاجات اللي بتكون واضحة أوي في الشخص الحاقد أنه دائما بيحاول يعجزك أو يخوفك يعني مثلاً لو قلتلتله هتبتدي مشروع هتلاقي بيقولك مش هتقدر ويحط حواجز بينك وبين حلمك أنا عايز مثلا أقدم في الحاجة دي يقولك أنا سمعت أنهم اخدوا عدد كذا السنة اللي فاتت وبخبرات عالية والسنادي سمعت مش هياخدوا حد ولما تروح تسأل تلاقي الحاجة دي متقفلتش ولا حاجة ولسه بياخدوا أنا عايز أطلع أتكلم قدام الناس عن الموضوع الفلاني وفي ناس قالولي أني بعرف اتكلم كويس عن الحاجة دي وحابين أنهم يسمعو مني تلاقيه بيقولك لا لا انت مش هتعرف تتكلم وأنت بتتكسف أصلا قدام الناس .
دائما أي حاجة جديدة أنت بتحاول تعملها هتلاقيه بيثبطك وقال ايه بيحوطك من الحاجة دي .
طيب اتحطيت في موقف أنك أنت وهو هتقدمه لحاجة معينة وأنت نجحت في الحاجة دي وهو لأ أنت تتصرف ازاي ؟؟! حاول تساعده هتلاقي كميه كرة وحقد غريبة طالعه من الشخص ده لأن في الحقيقة الشخص ده بيكرهك وأنت هتكون بتحاول تساعده فهيكون وحش اوي قدام نفسه لما تكون أنت بتساعده وهو بيحملك كل الحقد والكره ده فمبيقدرش يمسك نفسه وبيبتدي يطلع الكره ده و يطغي عليه.
طريقة كمان تعرف بيها الشخص ده حاول أنك تحكي موقف بينك وبين الشخص اللي حاسس أنه بيحقد عليك لأشخاص تانيين بطريقة محيادة بدون ذكر أسماء هتلاقي تسعين في المئة من الناس بتقولك ده بيحقد عليك حاول تبعد عنه .
وطبعا بخصوص الكلام السئ اللي الشخص الحقود بينقلهولك عن الناس غالبا أنت هتكتشف أن الشخص ده هو اللي بيقول عنك كدا قدام الناس أو بيحاول يثتثيرهم وهو اللي بيفتح الموضوع بحيث أنهم يغلطوا فيك وبكدا يكون كويس قدام نفسه وهم اللي بيتكلموا عليك غالبا الشخص ده مش بس بيحاول أنه يفهمك أنه بيحبك لأ ده كما بيضحك علي نفسه ويحاول يبين أنه بيحبك قدام نفسه علشان تفضل صورة إنه إنسان طيب ومش وحش من جوا.
طيب الناس بقي الطيبة اللي بتصعب عليها العشرة مع الأشخاص الحقودين دول وبتحاول تقعد مع نفسها وتوصل هو ايه اللي بيخليهم الناس دي تحقد عليا وبتحاول أنها تغيرهم هما غالبا حتي لو غيروهم مش هيغيروا غير حاجة قليلة منهم الشخصية الحقود دي بيكون سببها أنها اتعرضت لضغوط كبيرة في حياتها ونشأ عندها اضطرابات شخصية هي اللي خلاها كدا أو أن الشخصية دي مزاجية دائما قرفان وزهقان فعايز الناس تبقي زيه وممكن يكون متخيل أن الناس هما السبب في الحالة اللي هو فيها فبتنشأ جواه حالة أنه عايز ينتقم منهم عاوز يشوفهم كلهم حزينين وتعيسين في حياتهم زيه. طبعا موضوع الحقد والناس اللي بتحسد ده لسه مانتهاش أنا حبيت بس أوضح شويه حاجات للناس اللي انا متاكد أن أغلبيتهم بيعانوا أن في ناس حقودة في حياتهم وأنهم لازم يبعدوا عن الناس الحقودة وميحاولوش يتأثروا بيهم في أي حاجة ورساله إلي الناس الحقودة ربنا يهديهم ومش هقول أكتر من كدا .